mɛ̂-chɔ̂-ma lɛ yâ-ó-qō

a-šwè-thâ mɛ̂-chɔ̂-ma tê g̈â cɔ̀ ve cê.

mɛ̂-chɔ̂-ma ô ve tê ni qhe yɨ̂ ca g̈àʔ e lɛ í-kâʔ ší qha lâ lɛ í-kâʔ ca ni lɛ, í-kâʔ mâ mɔ̀.

qhe te lɛ hɛ-šā ɔ̀-qhɔ hɔ-khɨ ha thàʔ í-kâʔ cɔ̀ tā ve thàʔ ní dɔ̀ tá lɛ qòʔ e ve yò.

qhe te lɛ mâ mɔ-mɔ gà lɛ yâ hu la lɛ yâ pɔ la ve yò.

yâ ô ve lɛ̀ ɔ̀-to mâ cɔ̀ lɛ ó-qō cɛ tí… ó-qō-šī cɛ tí cɔ̀ ve yò.

yàʔ-qhâ ɔ̀-e thɔ̂ yɔ̂ thàʔ qha-dɛ̀ʔ hàʔ-šá tá pî lɛ qha-cɔ̂-cɔ̂ mɔ la pə̀ tê ni qhe ɔ̀-e chi lɛ̀ hɛ te ve ɔ̀-yân gà la lɛ, hɛ ca phɔ̂ e ve yò cê.

yâ ó-qō ô ve qôʔ ve: "ŋà e ò, nɔ̀ tâ phɔ̂. ŋà thàʔ phɔ̂ cɨ a," tɛ̀ʔ ɔ̀-e thàʔ qôʔ pî lɛ,

ɔ̀-e qôʔ ve: "nɔ̀ te mâ phɛ̀ʔ nɛ̀-ɔ̄," tɛ̀ʔ qôʔ pî qha lɛ, yâ ó-qō qɔ̀ʔ qôʔ ve: "ŋà te pɨ́ ve yò. ŋà thàʔ tɛ tá lɛ qòʔ e. à-mù mû phə̀ʔ la thâ ɔ̄ qɔ̀ʔ pû qhɔ̀ʔ la-ʔ," tɛ̀ʔ qôʔ pî lɛ, ɔ̀-e thɔ̂ yɔ̂ qôʔ pî ve qhe na lɛ tɛ tá ve yò.

mû phə̀ʔ la lɛ ɔ̀-e ca qɔ̀ʔ ni la thâ phɔ̂ pə̀ tā la ve thàʔ g̈a mɔ̀ ve yò.

hɛ thu ve ɔ̀-yân thɔ̂ yɔ̂ ɔ̀-e thàʔ qôʔ pî ve:"ŋà thu pɨ́ ve yò" tɛ̀ʔ ɔ̀-e thàʔ qôʔ pî lɛ ɔ̀-e yɔ̂ thàʔ hɛ qhɔ lo ca pû tɛ tá pî lɛ, yɔ̂ thu pə̀ tā lâ ve thàʔ g̈a mɔ̀ ve yò.

lɛ tê ni qhe mû-mì ô ve thàʔ šu ca bɔ̂ʔ yù la lɛ, a-šu yɔ̂-hɨ thàʔ g̈â ve ɔ̀-lɔn thàʔ šɔ̄ dàʔ ve yò.

qhe te lɛ yɔ̂ qôʔ ve, "ŋà thàʔ tí bɔ̂ʔ cɨ lâ kàʔ g̈â ve yò,"tɛ̀ʔ qôʔ pî lɛ, khún-hɔ́-khân qôʔ ve,"nɔ̀ bɔ̂ʔ g̈â ve qo, ŋà ve yâ-mî qhɔ̀ʔ g̈â cɔ̀ ve yò. a-šu tê g̈â thàʔ hə̂ʔ gâ ve qo hə̂ʔ phɛ̀ʔ ve yò. lɛ mû-mì kàʔ tê qhô qhe pî phɛ̀ʔ ve yò," tɛ̀ʔ khuń-hɔ́-khân qôʔ pî ve yò.

qhe te lɛ yâ ó-qō ô ve ca bɔ̂ʔ thâ qha-pə̀-è thàʔ g̈â lɛ, yɔ̂ ve yâ-mî lɛ mû-mì pî ve yò.

qhe te lɛ tê ni qhe yâ ó-qō ô ve cɨ-qhɔ qay qhɔ̀ʔ-nɔ́, yɔ̂ ve ɔ̀-pi-ma yɛ̀ šɔ šîʔ lɛ, ó-qō kə kɨ̀ à-mī tú bà šē pî lɛ, yâ ó-qō chi cɨ-qhɔ qɔ̀ʔ la thâ, fá tā kɨ̀ mâ cɔ̀ lɛ dàʔ jâ ve chɔ tê g̈â phɛ̀ʔ la ve yò.