ɛ̀-qhɛ̀ lɛ qhâʔ qhɔ ve yâ-mî-ma
à-šwè-thâ hɛ̂ʔ-pā thàʔ Lâhū yâ màʔ bɔ̂ʔ ve.
qhe te lɛ ô tê šɔ́ ɔ̄, màʔ bɔ̂ʔ e ve tê šɔ́, chɔ šɔ̄ və lɛ qay ve cê.
šu ɔ̄ thîʔ qo, ɛ̀-qhɛ̀ ô-ve ɔ̄, g̈âʔ-qú-ni tê khɛ thîʔ və lɛ, yàʔ-qɔ qá ɔ̄ câ thâ, ɔ̄ câ ve tê yân thâ ɔ̄, phə̀ʔ lɛ ɔ̄ câ ve te ve… yɔ̂ ɔ̄ phə̀ʔ ò lɛ g̈âʔ é tê khɛ pôʔ tɔ̂ʔ gɛ̀ e lɛ, "âa, ŋà mâ qay cɔ̂ lɔ. nɔ̀-hɨ qay" tɛ̀ʔ qôʔ ve cê.
qhe te lɛ ɔ̄, šu yɔ̂ àʔ qòʔ e pə tá ve.
"ŋà ɔ̄ qhe ɔ̀-hêʔ chi tê mà mɔ̀ lɛ, qòʔ e ve yò. màʔ bɔ̂ʔ mâ phɛ̀ʔ. qòʔ e šā" qôʔ ve cê.
qhe te lɛ, šu yɔ̂ àʔ qòʔ e pə lɛ ɔ̄ qhe, pɛ̂-g̈ù-li thɔ̂ʔ lɛ, á-ce-ku khâʔ lɛ ɔ̄, vâ-dɛ́-qō àʔ phɛ chî lɛ, á-qā ɔ̄ tɛ ve cê, mû-phə̀ʔ.
que te lɛ ɔ̄, vù vù vù qo tɛ̂ʔ tɛ̂ʔ… ô vâ-dɛ́-qō àʔ dɔ̂ʔ ve tê yân thâ, qhe te lɛ ɔ̄, yâ-mî-ma ô tê-g̈ɨ̀ âʔ qôʔ ho ve: "âa, nɔ̀-hɨ ɔ̀-pā ve ɔ̀-ha-ku qɔ̀ʔ la ò mɛ̀. tâ chɛ̂ ò mɛ̀. kɔ̂ʔ à mɛ̀."
qhe te lɛ, ɛ̀-qhɛ̀ á-qhɔ tí phôʔ yɨ̀ʔ e ve cê.
qhe te lɛ ɛ̀-qhɛ̀ qôʔ ve ɔ̄, " âa, ŋà á-qhɔ tâ yɨ̀ʔ. yâ qhɛ̂ qò kə la" qôʔ ve cê.
qhe te lɛ ɔ, "âa, mâ qò kə cɨ. lâʔ-lɔ ve yo" tɛ̀ʔ qôʔ ve tê yân thâ, yɔ̂-hɨ khān lɛ, ɛ̀-qhɛ̀ á-qhɔ g̈a yɨ̀ʔ ve.
qhe te lɛ ɔ̄, ɛ̀-qhɛ̀ ô-ve ɔ̄ yâ-mî-ma ô tê mō yɨ̀ʔ e pə̀ qhɔ̀ʔ-nɔ́, nɔ̂ʔ-qhɛ̂ g̈â-thèʔ tē lɛ, chɨ̂ʔ lɛ ô yâ qha cɔ̀-pā qhɛ̂ qhɔ ɔ̄ tɛ ve cê.
mû thî la lɛ ɔ̄, "nɔ̀-hɨ ve yâ qhɛ̂ qò kə ve lɔ ni-ʔ. à-thòʔ-ma šāy lâ tù le," qhe qôʔ lɛ ɔ̄, "âa, à-thòʔ-ma šāy lâ tù thɔ̂ à-thòʔ-ma hə̂ʔ kàʔ hə̂ʔ" qôʔ lɛ,
te lɛ ɔ̄, phu šé pî kàʔ mâ hə̂ʔ.
à-thòʔ-ma pî kàʔ mâ hə̂ʔ.
qhe te lɛ ɔ̄ ɛ̀-qhɛ̀ ô-ve ɔ̄ qhe lɛ yâ-mî-ma ô tê-mō thàʔ qôʔ pî ve: "âa, a-yɔ-qō dɔ̂ʔ na-e," qôʔ ve cê.
a-yɔ-qō ô-ve ɔ̄ dɔ̂ʔ na-e te lɛ yâ-mî-ma ô tê-mō ɔ̄ qhe, yàʔ-qɔ qɔ̀ʔ kɨ̀ ɔ̄ qay cɨ ve cê.
ɛ̀-qhɛ̀ chi yàʔ-qɔ tĥ-ɛ̀ qay lɛ, a-yɔ-qō ɔ̀-qhɔ lòʔ chɛ̂ ā qo ɔ̄, ɔ̀-thàʔ phɔ̂ ɔ̄ yâ-mî-ma dɔ̂ʔ a qo ɔ̄, qôʔ qôʔ te a qo ɔ̄, "à-thòʔ-ma šāy pî tù le, ɛ̀-qhɛ̀ thàʔ" qôʔ ve cê.
qhe te lɛ ɛ̀-qhɛ̀ ô-ve ɔ̄, "âa šāy pîʔ, šāy pîʔ" qhe qôʔ ve cêʔ.
qhe te lɛ tê pɔ̂ʔ qɔ̀ʔ qòʔ e.
ɛ̀-qhɛ̀ chi kàʔ yâ-mî-ma qhɔ̀ʔ-nɔ́ hâʔ hâʔ g̈àʔ qòʔ e lɛ, á-qhɔ qɔ̀ʔ mɨ, "âa, à-thòʔ-ma qôʔ lâ le, nɔ̀-hɨ àʔ" qôʔ lɛ…
"âa, ɛ̀-qhɛ̀ hàʔ šāy pîʔ, šāy pîʔ tí qôʔ lâ ɔ̄," qhe qôʔ ve cê.
qhe te lɛ "tê pɔ̂ʔ qɔ̀ʔ dɔ̂ʔ na e," mâ šī qôʔ lɛ ɔ̄…
qhe te lɛ tê pɔ̂ʔ qɔ̀ʔ dɔ̂ʔ na e lɛ ɔ̄, ɛ̀-qhɛ̀ chi ɔ̄, hâʔ qɔ̀ʔ lòʔ chɛ̂ ā lɛ ɔ̄, yâ-mî-ma tê-mō qôʔ qôʔ dɔ̂ʔ a lɛ, "âa, cha pîʔ, cha pîʔ" qhe qôʔ ve cê.
qhe te lɛ ɔ̄, yâ-mî-ma ô tê-mō g̈ɨ̂ qòʔ e lɛ ɔ̄,
ɛ̀-qhɛ̀ chi kàʔ hâʔ g̈ɨ̂ qòʔ e lɛ, á-qhɔ ɔ̄ gɔ̂-ne qɔ̀ʔ te chɛ̂ lɛ, "âa, à-thòʔ-ma qôʔ ve le? à-thòʔ-ma qôʔ lâ le?" qôʔ lɛ,
"âa, cha pîʔ, cha pi-ʔ tí qôʔ lâ ve ɛ̀-qhɛ̀ ò" qôʔ ve cê.
qhe te lɛ ɔ̄, yâ-mî-ma tê qhâʔ qhâʔ ve ɛ̀-qhɛ̀ tí phôʔ pàʔ ve cê.
qhe te ɛ ɔ̄, ɔ̀-phɔ̂ tê-mō qɔ̀ʔ la lɛ ɔ̄ qhe, "âa, ɛ̀-qhɛ̀ chi qhe chi qhe te lâ ɔ, nɔ̀-hɨ mâ chɛ̂ qhɔ̂ʔ-nɔ́ ɛ̀-qhɛ̀ pàʔ lâ ve" qôʔ lɛ, …
tê pɔ̂ʔ lɛ̀ ɔ̀-phɔ̂ tê-phā qɔ̀ʔ la lɛ, ɛ̀-qhɛ̀ àʔ g̈àʔ-yù lɛ, tî-pɛ̀ʔ a te lɛ phɔ e ve cê.
phɔ lɛ g̈ɔ̀ g̈àʔ-yù lɛ, g̈àʔ mâ mi, qhà qhe te g̈àʔ yù kàʔ mâ mi, tê pɔ̂ʔ mâ g̈a tá lɛ, qɔ̀ʔ la lɛ ɔ̄ qhe chi ɔ̄, chi ve ɔ̄, pɛ̂-g̈ɨ̀ g̈ɔ̀ khâʔ hɔ lɛ, qhe te šē lɛ ɔ̄, šá-lá yɛ̀ ɔ̄ thɛ-qɔ̄ qhɔ ɔ̄ lòʔ yɨ̀ʔ tá lɛ, ô-ve ša tú kɨ̀ yɛ̀ hàʔ mɨ tā lɛ ɔ̄, "ôoo, g̈ɨ̀-ša tɔ̂ʔ la ò lɔ, yàʔ-ni lɛ̀," qhe qôʔ ve cê.
qhe te lɛ yɔ̂ àʔ tân-tù tân pî ve.
ɔ̄ cā pî a qo câ.
qhe te šē lɛ ɔ, ɛ̀-qhɛ̀ tu la lɛ šu tê pɔ̂ʔ qɔ̀ʔ šī la lɛ ɔ̄,
dɔ̂ʔ pɛ̀ a te lɛ, qɔ̀ʔ phɔ e.
qɔ̀ʔ g̈àʔ yù lɛ,"âa, tê pɔ̂ʔ lɛ̀ qɔ̀ʔ g̈àʔ qɔ̀ʔ g̈àʔ yù lɛ, nī qɛ́ lɛ ɔ̄, tɛ šē lɛ ɔ̄, á-phàʔ g̈âʔ-bɛ šē lɛ ɔ̄, nī ŋɔ̂ʔ ɛ̀ pé ɛ̀ te ā pî lɛ ɔ̄, "âa, ɛ̀-qhɛ̀ qhâ-šɨ g̈àʔ-yù qhâ mâ hêʔ o lɔ. khá khá mù ní nɛ́ ɔ̄ tɔ̂ʔ ò lɔ" qôʔ ve cê.
qhe te á lɛ ɔ̄, qòʔ e ve cê.
qòʔ e qhɔ̀ʔ nɔ́ tê pɔ̂ʔ ɛ̀-qhɛ̀ chi tê pɔ̂ʔ qɔ̀ʔ qòʔ e tê pɔ̂ʔ qɔ̀ʔ g̈àʔ-yù ve chi ve ɔ̄, ɛ̀-qhɛ̀ chi ve ɔ̄, šɨ̂ʔ-cɛ̀ pu lón ɔ̄ tâʔ gà e ve cê.
šɨ̂ʔ-cɛ̀ lón ɔ̄ tâʔ gà e lɛ ɔ̄,…
qhe te lɛ ɔ̄, thu lɛ mô ɔ̄ lɔ̀-qá qhɔ ɔ̄ kə a te lɛ, "âa, ŋà lɛ̀ nɔ̀-hɨ thu lɛ mô í-kâʔ qhɔ kə a lâ qo-lɛ̀, ŋà í-kâʔ lɔ̂ɛ tɔ̂ʔ gà ve. mâ šɨ. ŋà àʔ thu lɛ nô há-phɔ̂ ɔ̄ kə a lâ qo ɔ, ŋà lɛ̀ nɛ̂ʔ èʔ kàʔ qay yò. šɨ e yò," qôʔ lɛ,
thu lɛ nô há-phɔ̂ nɛ́ pî a lɛ, há-qō qhɔ ɔ̄ phɔ lòʔ e ve cê.
qhe te še lɛ ɔ̄, ɛ̀-qhɛ̀ chi ve nô há-qō lòʔ e lɛ, šu à-mī g̈ɔ̀ mū kə ve, qhà-qhe te kàʔ mū kə mâ gà.
yɔ̂ á-pòʔ qɛ̂ʔ phə̂ tɔ̂ʔ ve cê, cô ɔ̀-qhɔ chɛ̂ àʔ lɛ.
qhe te šē lɛ ɔ̄, vâ-tɛ́ te kə á ve cê.
šɨ̂ʔ-tà jûʔ,… šɨ̂ʔ-tà chɔ chɔ lɛ ɔ̄, jûʔ kə ve cê.
ɛ̀-qhɛ̀ chi ɔ̄ qhɛ̂ qò lɛ ô šɨ̂ʔ-tà àʔ nɛ́ pî a lɛ, nù ni šē lɛ ɔ̄, "âa, ɛ̀-qhɛ̀ chi qhɛ̂ phîʔ ò lɔ. šɨ ò" qôʔ lɛ,
vâ tɛ̄ te á lɛ ɔ̄, qòʔ e cê.
qhe te lɛ ɔ̄, ɛ̀-qhɛ̀ chi á-thâ thàʔ … á-thâ-á-yɛ̂ pû ā lɛ, mə̂ʔ pî qha lɛ,…
yâ-mî-há nî mà mû-šɔ́-nàʔ ca ni gàe lɛ ɔ̄, ɛ̀-qhɛ̀ chi á-thâ-á-yɛ̂ mə̂ʔ khɔ̂ kâ e lɛ, "ɛ̀-qhɛ̀ ôo, ŋà-hɨ́-mà àʔ a-cí lòʔ cɨ a," qôʔ ve cê.
qhe te lɛ ɔ̄, "ɔ̀-chi mâ dàʔ ve tè-qɔ́-lɔ́ àʔ lòʔ la" tɛ̀ʔ qôʔ pî a lɛ ɔ̄,
mâ dàʔ ve tè-qɔ́-lɔ́ àʔ lòʔ la lɛ ɔ̄, tē pɛ̄ šē ve cê.
qhe te lɛ, ɛ̀-qhɛ̀ chi ve àʔ qɔ̀ʔ phɔ tɔ̂ʔ e gà ve cê.
qhe te lɛ, tê pɔ̂ʔ qɔ̀ʔ g̈àʔ yù lɛ, g̈àʔ mi šē ve cê.
g̈àʔ mi šē lɛ ɔ̄, ɔ́-qā qhɛ̂-qhɔ ɔ̄ phɛ-tī ā lɛ, g̈ɔ̀ šɛ pî ve cê.
qhe qo ɔ̄, mɛ̂ʔ phû ɔ̀-hɔ́ mù ā lɛ há-pɨ-de qhôʔ g̈à šɛ pî a qo, "a lô, a lô" qôʔ ve cê.
qhe qo, šɨ̂ʔ-mù-de qhôʔ ɔ̄ g̈ɔ̀ šɛ pî a qo ɔ̄, êe,šɨ̂ʔ-bù-de qhôʔ ɔ̄ g̈ɔ̀ šɛ pî a qo ɔ̄, "a lô, a lô" qôʔ ve cê.
há-pɨ-de g̈ɔ̀ šɛ pî a qo, "qâ càʔ, qâ càʔ" qhe qôʔ ve cê.
qhe te lɛ ɔ̄ mâ šɨ.
qɔ̀ʔ tɔ̂ʔ e gà e šē lɛ ɔ̄,…
tê pɔ̂ʔ lɛ̀ qɔ̀ʔ g̈àʔ-yù lɛ, šu yù g̈a šē lɛ ɔ̄,…
ôo, í-kâʔ cò lón ɔ̀-hɔ́ ɔ̄ phɛ chî tá ve cê.
phɛ chi tá lɛ ɔ̄, qhe te šē lɛ, tânkà pā tê mō lōn là cê.
qhe te lɛ, "ɛ̀-qhɛ̀ ò, nɔ̀ à-thòʔ-ma te cò ɔ̀-hɔ́ ɔ̄ chɛ̂ le," qô lɛ ɔ̄,
"mɛ̂ʔ-šī nà lɛ mêʔ-ši šá mù ve yâ o nè" qôʔ ve cê, hɛ̂ʔ-pā ô ve tê mō àʔ…
"âa, ŋà kàʔ mù gâ a ɛ̀-qhɛ̀ ò," qôʔ lɛ ɔ̄, "yù tɔ̂ʔ a" qôʔ pî cê ma-nè.
yù tɔ̂ʔ pî a lɛ, tɔ̂ʔ gà šē cê, ɛ̀-qhɛ̀ ô ve…
qhe te lɛ, tânkà pā ô-ve tê-mò ɔ̄, lɔ̀ í-mû ɔ̀-ha phâʔ g̈àʔ ā ve, tânkà te la ā ve, mɛ̂ʔ-šī nà pā tí tí cɔ̂ šē lɛ,…
phɛ lɛ ɔ̄, ô ɔ̀-hɔ́ ɔ̄, cò ɔ̀-hɔ́ ɔ̄, í-kâʔ šá mù cɨ ve te lɛ, tɔ̂ʔ chêʔ ce a lɛ ɔ̄, šɨ pə̀ e lɛ ɔ̄,…
tân-kà pā ô tê mō ve mɔ̂ phu ši ɛ̀-qhɛ̀ g̈a və ve cê.
qhe te lɛ, qòʔ e lɛ ɔ̄, á-qhɔ qɔ̀ʔ qòʔ e ve tê yân thâ, "ôo, ɛ̀-qhɛ̀ nɔ̀ qhà-qhe te g̈a le. ŋà-hɨ nɔ̀ àʔ šɨ tù te ve kàʔ, nɔ̀ phu ši chi ma g̈a ve qhà-qhɛ te le" qôʔ lɛ,
"âa, í-kâʔ šá mù lɛ g̈a ve yò, nɔ̀-hɨ te á lâ lɛ" qôʔ cê.
qhe te lɛ ɔ̄, "âa, ŋà-hɨ kàʔ hə̂ʔ gâ" qôʔ lɛ ɔ̄, te šī və lɛ ɔ̄, ô-kàʔ hɔ-lo, qhá-jū-lu ɨ̄ lɛ̀ ve í-mû-qo tê g̈â tê mà pû cɨ lɛ ɔ̄, ô-ve ɔ̀-hɔ́ phɛ chî lɛ ɔ̄, chɔ lòʔ chɛ̂ pə̀ qhɔ̀ʔ-nɔ́, cô í-kâʔ qhɔ ɔ̄ lòʔ e ve cê.
tê pɔ̂ʔ lɛ̀ í-kâʔ cú pî a lɛ phêʔ-dɔ̂ a-lâ ve cê.
qhe te lɛ ɔ̄, ô à-pū-qu tê-mà mâ lòʔ e lɛ, "cô cô cô ni šu ši bɛ̂ dàʔ ve," qôʔ a lɛ ɔ̄, yɔ̂ kàʔ pɔ̂ʔ lòʔ e lɛ tɔ̂ʔ chêʔ a lɛ, tê qhâʔ ma šɨ e pə̀ lɛ ɔ̄, chɔ tê qhâʔ ve yâ-mî ɔ̄ yɔ̂ tí g̈a ve cê.