yâ-cù-ši lɛ lâ ɔ̀-lɔn

à-šoè thâ cê šā-bɔ̂ʔ-pā tê chi g̈â cɔ̀ ve cê.

šā-bɔ̂ʔ-pā tê chi g̈â ve ɔ̀-qhɔ lo yâ-cù-ši fə́-qûʔ-ni tê g̈â yɔ̂ šu cè te qay ve cê.

qhe te lɛ, hɛ-pɨ́-qhɔ šā-bɔ̂ʔ kɨ̀ thə̀n lón ɔ̀-qhɔ lo gà lɛ, yɔ̂-hɨ chɛ̂ kɨ̀ ô-ve ɔ̀-qhɔ lo gà ve tê yân thâ, lâ khɨ thàʔ g̈a mɔ̀ lɛ, yɔ̂-hɨ há mâ phɛ̀ʔ cê.

qhe te lɛ yɔ̂-hɨ ša-bɔ̂ʔ-pā ô-ve tê-phā kɔ̂ʔ jâ lɛ, khá-pū-lu te ve cê.

khá-pū-lu chi ɔ̀-qhɔ lo lòʔ yɨ̀ʔ kɨ̀ te ve cê.

mû phə̀ʔ thé gà lɛ, yɔ̂-hɨ khá-pū-lu ô-ve thàʔ mû-phe lo ca phɛ chî lɛ, tâʔ yɨ̀ʔ tù ve te ve cê.

qhe te lɛ, yâ-cù-ši ô-ve qôʔ pî ve: "šā-mɔ́ tê-phā ò, á-thɔ a-cí ŋā" ô qhe qôʔ pî ve cê.

"nɔ̀-hɨ pòn ve qhe ngà kàʔ pòn gâ. ŋà thɔ̂ mâ šɨ gâ. chò kàʔ lâ chɛ̂ kɨ̀ cɔ̀ mâ jâ lɛ, lâ mâ ve pa-tɔ ŋà kàʔ nɔ̀-hɨ qhe mû-phe yɨ̀ʔ gâ," ô qhe qôʔ pî ve cê.

qhe te lɛ, šā-mɔ́ ô-ve tê-pa, á-thɔ mâ ŋā pî.

yɔ̂-hɨ vâ-qhɛ̂ thèʔ bà ve… yâ-cù-ši chi yɔ̂ g̈ɔ̂ʔ lɛ, vâ-pu lón tê mà ɔ̀-qhɔ lòʔ e ve cê.

cô kàʔ lòʔ e lɛ ca ni ve tê yân thâ, chɔ yɨ̀ʔ lɔ̀ʔ ɛ̀ʔ qhe cɛ ɛ̀ g̈a mɔ̀ ve cê.

á-khɛ g̈ɔ̂ʔ və lɛ, ô kàʔ ɔ̀-qhɔ lo yɔ̂ ca ni lɛ, ô kàʔ yɨ̀ʔ e ve cê, tân-khɨ̂n thâ…

qhe te lɛ, yɔ̂-hɨ šā-bɔ̂ʔ-pā tê-phā mû phə̀ʔ la ve tê yân thâ, khá-pū-lu ɔ̀-qhɔ lo lòʔ yɨ̀ʔ e ve cê.

qhe te lɛ, lâ gà la ve tê yân thâ, lâ pɔ̂ʔ chèʔ câ ve cê, qha-pə̀e tê-chi g̈â ve thàʔ chèʔ câ pə̀ šē ve cê.

tê pɔ̂ʔ lɛ̀ yɔ̂-hɨ qha-pə̀e ve thàʔ chèʔ câ pə̀ lɛ, yâ-cù-ši vâ pu qhɔ yɨ̀ʔ ā ve àʔ yɔ̂-hɨ lâ ô-ve tê-phā mɛ̄-tu cɔ jûʔ kə lɛ cɔ ši ve cê.

qhe te lɛ, lâ mɛ̄-tu jûʔ kə lɛ ši ve thàʔ yâ-cù-ši chi ve yɔ̂ á-khɛ lâ mɛ̄-tu thàʔ phɛ lɛ vâ-pu thâʔ hɔɛ̄ tī ve cê.

ô qhe tí te ve cê, lâ tê-chi khɛ ve hàʔ.

qhe te lɛ mû thî la ve tê yân thâ, yɔ̂ ɔ̀-bà pá lo tɔ̂ʔ qay lɛ, šā-bɔ̂ʔ-pā šɨ ā ve á-thɔ tê-phā yù lɛ, lâ tê-phā thàʔ chɔ phɛ̂ ve cê.

qhe te lɛ lâ ô-ve tê-phā qha pə̀e šɨ e pə̀ ve cê.

pə̀ ve yò.