vè lɛ lâ ɔ̀-lɔn

chi bə̀ʔ à-pū tê mà qhay mā lâ šā, ɔ̀-ví ɔ̀-ni Lâhū yâ tê-phā ò.

tàʔ-í na tā šē.

à-šwè-thâ lâ tê khɛ lɛ vè tê khɛ nàʔ-ú te dàʔ ve.

lâ qôʔ ve: "ŋà ɔ̀-qhôʔ lɛ̀ cû-yī ɨ̄ ve ɔ̀-g̈â ɨ̄ ve chɔ mâ cɔ̀" tɛ̀ʔ qôʔ pî ve.

vè qôʔ ve: "nɔ̀ cû-yī ɨ̄ ve tɛ̀ʔ nɔ̀ dɔ̂ ve lâ. mâ hêʔ šē mɛ̀. nɔ̀ ɔ̀-qhôʔ ɨ̄ ve tê g̈â cɔ̀ šē.

lâ lón qôʔ ve: "a-šu le. chɔ yâ qôʔ ve chi bə̀ʔ cɔ̀ ɔ lâ."

: "cɔ̀ ɔ. cɔ̀ tɛ̀ ma yò. nɔ̀ cû-yī te dàʔ gâ qo, ŋà mā lâ a."

: "khə̀ʔ, khə̀ʔ… mā a ni. ŋà tê-pɔ̂ʔ tí qa-chèʔ lɛ câ mā lâ a," qôʔ pî ve yò.

tê-ni gà lɛ, yâ-mî nî g̈â hɛ qhɔ lo qay ve thàʔ g̈a mɔ̀ lɛ, vè thàʔ qôʔ pî ve: "chi yò lâ" tɛ̀ʔ vè thàʔ na-ni lɛ, nâʔ mâ cɔ̀ lɛ "mâ hêʔ" tɛ̀ʔ qôʔ pî ve yò.

tê pɔ̂ʔ hɔ́-qhâʔ tê g̈â nâʔ tâʔ lɛ hɛ qhɔ lo là ve thàʔ g̈a mɔ̀ lɛ, lâ qôʔ ve: "vè ò, chi yò lâ" tɛ̀ʔ na-ni lɛ,

vè qôʔ ve: " yò, yò" qôʔ pî ve yò.

chɔ chi ve thàʔ yɔ̂ mɔ̀ lɛ, yɔ̂ g̈ɨ̂ là ve thàʔ chɔ g̈a mɔ̀ thâ, yɔ̂ tâʔ tā ve nâʔ tà cɛ ɔ̀-dɛ̀ nî mà ve thɔ lɛ, ɔ̀-šī-ɛ́ pá ɔ̄ bɔ̂ʔ pî lɛ, te pɔ̂ʔ qɔ̀ʔ là lɛ, khɔ̀ʔ šī ve phɔ̂ ɔ̄ bɔ̂ʔ pî ve yò.

yɔ̂ pɔ̂ʔ phɔ e lɛ, vè qôʔ pî ve: "nɔ̀ ŋà qôʔ ve â hêʔ lɔ lâ".

: "yò lɔ. ca khān mâ g̈a. yɔ̂ ve bɔ̂ʔ qha lâ ve pòn, pòn te qha lâ lɛ, ɔ̀-qā-ɔ̀-le cɔ́ cí cɔ́ cí cɔ chèʔ lâ ve khān mâ g̈a lɔ yâ" tɛ̀ʔ yɔ̂ vè thàʔ tho pî ve yò.

yò lê. à-pòn chi ve tê mà lɛ̀, tê g̈â le-le a-šu yɔ̂ ɔ̀-to thàʔ šɔ̄-ni qo cɔ̀ jɔ.

a-šu yɔ̂ ɔ̀-to thàʔ cû-yī bî jâ tɛ̀ʔ dɔ̂ thɔ̂ mâ hêʔ lɔ.

ŋà ɔ̀-qhôʔ ve cɔ̀ šē lɔ.

ŋà-hɨ Lâhū yâ tê-phā ɔ̀-qhɔ chi bə̀ʔ kàʔ phɛ̀ʔ chɛ̂ šē hɛ́ lê.

phɛ̀ʔ chɛ̂ ve qo, ɔ̀-ví-ɔ̀-ni-hɨ ò, hâʔ-hâʔ dɔ̂-phûʔ mɛ̀ tɛ̀ʔ chi qhe ša-tìʔ pî lâ ve yò.

qha-dɛ̀ʔ na-yù mɛ̀.

à-pòn chi lɛ̀ pə̀ ve yò.