mɛ̂ʔ-cú-pā lɛ khɨ-qɔ̀ʔ-pā

à šwè thâ chɔ nî g̈â ɔ̀-chɔ̂ te dàʔ ve yò cê.

tê g̈â lɛ̀ mɛ̂ʔ-cú-pā tê g̈â lɛ̀ khɨ-qɔ̀ʔ-pā yò cê.

yɔ̂ hɨ nî g̈â ɔ̀-chɔ̂ te dàʔ ve ɔ̀-qhɔ lo, te ni thâ dɔ̂ tɔ̂ʔ la ve tê yân, yɔ̂ hɨ́ mà nî g̈â tê gɛ qay lɛ mɔ́-pā ge qhà-qhe te lɛ mɛ̂ʔ mɔ̀ la tù qhà-qhe te lɛ khɨ thê la tù ca na-ni ve yò cê.

yɔ̂-hɨ́-mà nî g̈â mɔ́-pā gɛ qay ve tê yân thâ, mɔ́-pā yɔ̂-hɨ́-mà thàʔ qôʔ pî ve: "nɔ̀-hɨ́-mà qay ve yàʔ-qɔ ɔ̀-qhɔ lo cɔ̀ ve nɔ̀-hɨ ve yàʔ-qɔ ɔ̀-qhôʔ lo šɨ̂ʔ-cɛ̀ ɔ̀-qá pɛ lo ŋâʔ phɨ thàʔ mɔ̀ ve tê yân thâ, mɛ̂ʔ-cú-pā tê g̈â thàʔ tâʔ e lɛ yù cɨ" tɛ̀ʔ qôʔ pî ve yò cê.

ô-ve qha-šū-šū mɔ́-pā qôʔ ve qhe yɔ̂-hɨ́-mà nî g̈â tê gɛ qay chɛ̂ thâ, khɨ-qɔ̀ʔ-pā mû-phe chî ni ve tê yân thâ, ŋâʔ phɨ thàʔ g̈a mɔ̀ ve yò cê.

ŋâʔ phɨ thàʔ g̈a mɔ̀ ve pa-tɔ, mɛ̂ʔ-cú-pā thàʔ tâʔ e cɨ lɛʔ qôʔ ve … mɛ̂ʔ-cú-pā chi qhe qôʔ ve, "ŋà lɛ̀ mɛ̂ʔ mâ mɔ̀ ve pa-tɔ, ɔ̀-cə̀ chi tê-phā thâ mɔ̀ mâ phɛ̀ʔ. ŋà tâʔ e mâ g̈a" tèʔ qôʔ pî ve yò.

khɨ-lù-pā qôʔ ve: "yàʔ qhâ nɔ̀ tâʔ e phɛ̀ʔ ve yò. nɔ̀ thàʔ ŋà mā lâ tù ve yò," tɛ̀ʔ qôʔ pî ve yò cê.

mɛ̂ʔ-cú-pā tâʔ e chɛ̂ ve tê-yân-thâ, tê khɨ gà lɛ, chi qhe qôʔ ve: "gà ò lâ" tɛ̀ʔ na-ni ve yò.

yàʔ-qhâ ɔ̀-chɔ̂ tê g̈â qɔ̀ʔ qôʔ ve: "mâ gà šē. tâʔ e šē."

qɔ̀ʔ tâʔ e lɛʔ, tê pɔ̂ʔ qɔ̀ʔ na-ni ve tê-yân-thâ, "gà ò" tɛ̀ʔ qôʔ ve yò.

"gà ò" tɛ̀ʔ qôʔ ve tê-yân-thâ, yɔ̂ mɔ̀ gâ ve thàʔ-pa-tɔ mɛ̂ʔ g̈â-thèʔ ŋá ni lɛʔ tê cɔ̀ há yɔ̂ mɛ̂ʔ qɔ̀ʔ mɔ̀ la ve yò.

chi ve qha šū-šū yɔ̂ làʔ-šɛ ŋâʔ-u thàʔ yù ve tê-yân-thâ, ŋâʔ-u chi lɛ̀ vɨ̀ phɛ̀ʔ ve thàʔ-pa-tɔ, ɔ̀-ch-̂ tê g̈â mɨ tā kɨ̀ lo, ce pə pî ve tê-yân-thâ, ɔ̀-chɔ̂ tê g̈â thɔ̂ kɔ̂ʔ jâ ve thàʔ-pa-tɔ, tê-cɔ̀-há pɔ̂ʔ tu lɛʔ yɔ̂ ve khɨ-šɛ qɔ̀ʔ thê la ve yò cê.

chi thàʔ-pa-tɔ ŋà hɨ Lâhū yâ chi tê coe thɔ̂, chɔ chi ve nî g̈â thàʔ hên yù qo dàʔ ve yò.

mɔ́ pā ve khɔ̂ thàʔ na yù ve pa-tɔ, mɛ̂ʔ-cú ve thɔ̂ mɛ̂ʔ qɔ̀ʔ mɔ̀ la pə̀ ve thàʔ g̈a šī ve yò.

khɨ qɔ̀ʔ ve thɔ̂ khɨ thê la ve thàʔ g̈a šī ve yò.

na yù pɨ́ ve chɔ tê g̈â le le ɔ̀-yâ ɔ̀-dù lɛ ɔ̀-ví ɔ̀-ni tê g̈â le-le thɔ̂, ɔ̀-cə̀ chi tê-phā thàʔ hên yù qo, dàʔ ve yò tɛ̀ʔ ŋà-hɨ Lâhū chɔ-mɔ̂ à šwè thâ chi qhe qôʔ tā ve yò.